MGA RELIHIYOSONG TULOMANON NGA MABUHAT SA USA KA BANAY ATOL SA KWARESMA UG SA SEMANA SANTA

Suggested religious activities for a Catholic family / household in celebration of the Holy Week.

Due to the imposition of Social/Physical Distancing and the Enhance Community Quarantine to prevent the spread of COVID / Corona Virus, the Archdiocese of Cebu has issued some activities / devotions to follow at home in celebration of the Holy Week.

TAMDANAN

ALANG SA MOTAMBONG SA MISA PINAAGI LAMANG SA PAGTAN-AW SA TELEBISYON UG PAGPAMINAW SA RADYO UG MGA KAHIMANAN

1.      Magbutang og igong lamesa nga tinabonan og puti nga panapton duol sa telebisyon o radio o mga ka-himanan sa komunikasyon.

2.      Magdagkot og duha ka mga kandela, magbutang og krusipiho ug imahen sa Mahal nga Bierhen Maria ibabaw sa maong lamesa.

3.      Mag-andam og mga lingkoranan aron maka-lingkod sa maampoon nga paagi.

4.      Magsul-ob og limpyo ug ligdong nga bisti sama og mosimba sa simbahan.

5.      Buhaton ang mga naandang pagbarog, pag-lingkod, ug pagluhod sulod sa Santos nga Misa.

6.      Gidasig ang mga mosimba sa pagtubag ug paglitok sa mga pag-ampo ug sa pag-awit sa mga alawiton.

7.      Mag-ampo sa hustong paagi ug dili magbuhat sa mga butang nga dili angay sulod sa Santos nga Misa sama sa pagtabi-tabi, paggawas-gawas ug pagkaon-kaon.

8.      Dili magpasamok sa mga texts ug calls sa mga mobile phones (gawas lamang kon kini gikinahanglan o emergency).

MGA ALAMPOON

SULOD SA MISA

1.     PAG-AMPO SA  SPIRITUAL COMMUNION

(Litokon sa panahon sa Pangalawat)

Akong Jesus, nagatuo ako nga Ikaw anaa sa Labing Balaang Sakramento. Gihigugma ko ikaw labaw sa tanan, ug ako nangandoy sa pagkalawat kanimo sa akong kalag.  Sanglit dili ko man ikaw madawat diha sa paaging sacramental, umari ka sa akong kasingkasing pinaaging spiritual. Hangpon ko Ikaw sama’g ania ka uban kanako, ug hingpit kong gihiusa ang akong kaugalingon nganha kanimo. Ayaw itugot nga ako. Mahimulag kanimo. Amen.

2.     ORATIO IMPERATA

(Litokon human sa Pangalawat)

Diyos, among Amahan, misangpit kami kanimo niining panahon sa among panginahanglan nga unta panalipdan mo kami batok niining hulga sa COVID-19 nga mikalas na sa pipila ka mga kinabuhi sa among kaigsuonan ug nahiagom sa kadaghanan.

Ngangliyupo kami sa imong grasya alang sa mga tawo nga gitahasan sa pagtu-on sa hinungdan niining maong virus nga nagdala sa makalilisang nga sakit.

Giyahi ang mga kamot ug lamdagi ang mga hunahuna sa mga doctor nga nag-alima sa mga masakiton subay sa ilang katakus ug dinuyogan sa gugma ug kaluoy.  Kanila usab nga mga kawani sa local ug nasudnong pangagamhanan ug kanilang mga pribado nga mga ahensya nga nangita ug kasulbaran sa maong epidemya.  Mahatagan unta sila sa imong Diyosnong lamdag.

 

Nangaliyupo usab kami kanila nga nahiagom sa maong pandemya, mahatag unta pagbalik ang kapiskay sa ilang panglawas.

Itanyag kanamo ang grasya nga magkahiusa kami sa pagbuhat alang sa kaayohan sa mga nagkinahanglan.

Kini among gipangayo pinaagi sa among Ginoong Jesukristo, Imong Anak, nga nagapuyo ug nagahari uban kanimo diha sa kahiusa sa Espiritu Santo, Diyos, hangtud sa kahangruran.

Amen.

Maria Panabang sa mga Kristiyanos,  i-ampo mo kami

San Rafael Arkanghel,  i-ampo mo kami

San Roque,  i-ampo mo kami

San Lurenzo Ruiz,  i-ampo mo kami

San Pedro Calungsod,  i-ampo mo kami

San Vicente Ferrer,  i-ampo mo kami

MGA

PAG-AMPO UG DEBOSYON

NGA MABUHAT SA PANIMALAY

1        Ang Akto sa Paghinulsol

2        Ang Santos nga Rosaryo

3        Ang Dalan sa Krus  (Via Crucis)

4        Ang Dalan sa Inahan  (Via Matris)

5        Chaplet of the Divine Mercy

6        Pag-ampo kang San Jose

7        Pag-ampo kang Jesus Gilansang sa Krus.

8        Pag-ampo sa Oratio Imperata matag alas 12 sa udto ug alas 8 sa gabii

9        Pag-ampo ngadto sa mga Anghel nga Magba-lantay

TAMDANAN

ALANG SA MOSUBAY SA MGA KASAULOGAN SA SEMANA SANTA DIHA SA PANIMALAY

DOMINGGO SA LUKAY

(Palm Sunday of the Lord’s Passion)

1.      Ang banay maggunit og lukay ug ipataas kini panahon sa pag-ampo sa panalangin.  Wala na gikinahanglan ang  balaang tubig tungod kay ang pag-ampo ug ang Balaang Kasulatan naghatag na kini sa panalangin.

2.      Mamati sa Pagsangyaw sa  Ebanghelyo o Passion Narrative.

HUWEBES SANTO

(Thursday of the Lord’s Supper)

1.      Ang Pangulo sa banay mohugas sa mga tiil sa iyang sakop.

2.      Ang banay magtapo diha sa talad kan-anan alang sa hiniusang pag-inambitay. (Alang sa paghandom sa kataposang panihapon sa Ginoo)

BIYERNES SANTO

(Friday of the Passion of the Lord)

1.      Ang banay gidasig sa pagpamalandong ug pag-ampo sa Via Crucis.

2.      Mamati sa Pagsangyaw sa Ebanghelyo o Passion Narrative.

3.      Ang banay mosimba o mohatag og pasidungog sa krusipiho.

4.      Gidasig ang banay sa pagpuasa.

5.      Gidasig ang banay sa pagtan-aw ug/o pagpamati sa Siete palabras nga ipahigayon sa ABS-CBN channel 2 ug sa DYRF 1215kHz gikan sa alas 12 sa udto hangtod sa alas 3 sa hapon.

SABADO SANTO

(Holy Saturday)

Gidasig ang banay sap ag-ampo ug pagpadayon sa taas nga pagpuasa hangtod sa Bihilya.

BIHILYA SA PAGKABANHAW

(Easter Vigil in the Holy Night)

1.      Magtapok ang banay sa hapon.

2.      Mamati sa mga basahon sa Misa ug sa Ebanghelyo.

3.      Mobuhat sa Pagbag-o sa mga Saad sa Bunyag.

4.      Magtapok alang sa hiniusang pag-inambitay sa talad kan-anan.

DOMINGGO SA PAGKABANHAW

(Easter Sunday)

Mobuhat sa Pagbag-o sa mga Saad sa Bunyag.